អន្តរជាតិ៖​ ប្រទេសប្រ៊ុយណេដារូសាឡឹម កំពុងធ្វើជាម្ចាស់ផ្ទះនៃកិច្ចប្រជុំថ្នាក់រដ្ឋមន្ត្រីទទួលបន្ទុកព័ត៌មានអាស៊ាន លើកទី ១៧ ស្តីពីព័ត៌មាន (AMRI) និងកិច្ចប្រជុំមន្ត្រីជាន់ខ្ពស់អាស៊ានលើកទី ២២ ដែលទទួលបន្ទុកព័ត៌មាន (SOMRI) និងកិច្ចប្រជុំពាក់ព័ន្ធដែលប្រព្រឹត្តទៅពីថ្ងៃទី៧ ដល់ថ្ងៃទី៩ ខែឧសភា ឆ្នាំ២០២៥។ កិច្ចប្រជុំរដ្ឋមន្ត្រីទទួលបន្ទុកព័ត៌មានអាស៊ានលើកទី១៧នេះ មានគោលបំណងពង្រឹងកិច្ចសហប្រតិបត្តិការក្នុងតំបន់ក្នុងប្រព័ន្ធផ្សព្វផ្សាយ និងព័ត៌មានមាតិកាឌីជីថលចំពេលមានការវិវត្តន៍ថ្មីៗ។

ព្រឹត្តិការណ៍នេះត្រូវបានបើកជាផ្លូវការដោយព្រះអង្គម្ចាស់ HAJI AL-MUHTADEE BILLAH IBNI HIS MAJESTY SULTAN HAJI HASSANAL BOLKIAH MU’IZZADDIN WADDAULAH ជាព្រះរជ្ជទាយាទ និងជាទេសរដ្ឋមន្ត្រីនៃទីស្តីការនាយករដ្ឋមន្ត្រីនៃប្រទេសព្រុយណេ។

ក្នុងសុន្ទរកថាស្វាគមន៍របស់ព្រះអង្គម្ចាស់ ក្នុងពិធីបើកកិច្ចប្រជុំ នៅព្រឹកថ្ងៃទី៧ ខែឧសភានេះ បានគូសបញ្ជាក់អំពីសារៈសំខាន់នៃការចូលរួមប្រព័ន្ធផ្សព្វផ្សាយជាយុទ្ធសាស្ត្រក្នុងការលើកកម្ពស់មជ្ឈភាពអាស៊ាន។ ព្រះអង្គម្ចាស់ Awang Ajman bin Haji Meludin ក្នុងនាមជាព្រះប្រធាន AMRI បានសង្កត់ធ្ងន់លើវឌ្ឍនភាពដ៏សំខាន់ក្នុងការប្រយុទ្ធប្រឆាំងនឹងព័ត៌មានក្លែងក្លាយ និងបានអំពាវនាវឱ្យបន្តកិច្ចសហប្រតិបត្តិការក្នុងចំណោមរដ្ឋជាសមាជិក។

កិច្ចប្រជុំបានប្រមូលផ្តុំមន្ត្រីជាន់ខ្ពស់មកពីប្រទេសសមាជិកអាស៊ាន ទីម័រខាងកើត ព្រមទាំងលោក San Lwin អគ្គលេខាធិការរងអាស៊ានសម្រាប់សហគមន៍សង្គមវប្បធម៌អាស៊ាន។ ការពិភាក្សាបានផ្តោតលើការបង្កើនកិច្ចសហប្រតិបត្តិការក្នុងតំបន់ ការផ្លាស់ប្តូរការអនុវត្តល្អ និងការដោះស្រាយបញ្ហាសំខាន់ៗដូចជាព័ត៌មានក្លែងក្លាយ ការដាក់បញ្ចូលឌីជីថល និងការប្រើប្រាស់សីលធម៌នៃបញ្ញាសិប្បនិម្មិត (AI) ចំពេលមានការផ្លាស់ប្តូរឌីជីថលយ៉ាងឆាប់រហ័ស។

ទន្ទឹមនឹងនោះ កម្ពុជាតំណាងដោយលោក នេត្រ ភក្ត្រា រដ្ឋមន្ត្រីក្រសួងព័ត៌មាន បានដឹកនាំគណៈប្រតិភូកម្ពុជាចូលរួមកិច្ចប្រជុំរដ្ឋមន្ត្រីព័ត៌មានអាស៊ានលើកទី ១៧ ស្តីពីព័ត៌មាន (AMRI) នេះ។

ក្នុងឋានៈជាអនុប្រធាននៃកិច្ចប្រជុំ កម្ពុជាបានចូលរួមក្រោមប្រធានបទ «ប្រព័ន្ធផ្សព្វផ្សាយជំរុញការយល់ដឹងរួម៖ ការផ្លាស់ប្តូរតួនាទីរបស់ប្រព័ន្ធផ្សព្វផ្សាយក្នុងការជំរុញកិច្ចសហប្រតិបត្តិការ និងការយល់ដឹងគ្នាទៅវិញទៅមកនៅក្នុងអាស៊ាន MAJU» ដែលសង្កត់ធ្ងន់ទៅលើតួនាទីវិវត្តនៃប្រព័ន្ធផ្សព្វផ្សាយក្នុងការពង្រឹងកិច្ចសហប្រតិបត្តិការក្នុងតំបន់ អត្តសញ្ញាណ និងការយោគយល់គ្នាទៅវិញទៅមក។ ប្រទេសកម្ពុជានឹងទទួលធ្វើជាប្រធានប្តូរវេននៃកិច្ចប្រជុំ AMRI លើកទី១៨ នៅឆ្នាំ២០២៧ខាងមុខ។

កិច្ចប្រជុំថ្នាក់រដ្ឋមន្ត្រីនេះ ត្រូវបានរៀបចំឡើងដោយប្រទេសប្រ៊ុយណេ ក្រោមការដឹកនាំអង្គប្រជុំដោយព្រះអង្គម្ចាស់ Haji Al-Muhtadee Billa binជាព្រះរជ្ជទាយាទ និងជាទេសរដ្ឋមន្ត្រីនៃទីស្តីការនាយករដ្ឋមន្ត្រីនៃប្រទេសព្រុយណេ។ 

កិច្ចប្រជុំបានលើកឡើងពីវឌ្ឍនភាពជាយុទ្ធសាស្រ្តនៅក្នុងប្រព័ន្ធផ្សព្វផ្សាយ និងព័ត៌មាន ជាមួយនឹងការពិភាក្សាសំខាន់ៗលើការប្រយុទ្ធប្រឆាំងនឹងព័ត៌មានក្លែងក្លាយ ការលើកកម្ពស់អក្ខរកម្មឌីជីថល និងការស្វែងយល់ពីផលប៉ះពាល់សីលធម៌នៃ AI និងការផ្លាស់ប្តូរឌីជីថល។

ក្រៅ​ពី​រដ្ឋមន្ត្រី និង​មន្ត្រី​ជាន់​ខ្ពស់​ទទួល​បន្ទុក​ផ្នែក​ព័ត៌មាន​ពី​រដ្ឋ​សមាជិក​អាស៊ាន កិច្ចប្រជុំការ​មាន​តំណាង​មក​ពី​អាស៊ាន​បូក​បី ចិន ជប៉ុន និង​កូរ៉េ​ខាង​ត្បូង៕

^{រូបថតរបស់ Long David។}